Elsa Rozendal di MAN: Mester hasi muchu mas na konsientisashon di e siudadano riba produktonan alimentisio.

Elsa Rozendal di MAN: Mester hasi muchu mas na konsientisashon di e siudadano riba produktonan alimentisio.

Awe Parlamento a trata e punto di agènda: Produktonan kaduká, (espesialmente karni, den diferente supermerkado i establesimentu aki na Kòrsou i sanshonnan ku ta keda duná pa no kumplimentuku lei)

Un tópiko, ku sigur a hala masha hopi atenshon di nos di Frakshon di MAN i Pueblo di Kòrsou kompletu.
E tempu ku e tópiko aki tabata den su momentu “piek”, nan a asta traha un tambú riba e tópiko yamá “Kiko Awor?”. Esaki ta demostrá e efekto ku e problemátika aki tabata tin den tur hogar i den komunidat.
Nos sa ku kòntròlnan a sigui i e situashon ta aparentá di ta bou di kòntròl. Pero manera e nòmber di e tambú mes ta bisa, e Parlamentario a puntra Ministernan, “Kiko Awor”?
Kon ta bai protehá e konsumido mihó i evitá pa e tipo di situashonnan aki pasa den futuro?
Kon e siudadano ku ta drenta e toko i kumpra produkto, manera por ehèmpel, keshi kortá, sin fecha di vense, si e ta bon si òf no?
Nos sa ku tin un “Warenlandsverordening”1997 ku tei netamente pa protehá e konsumidó
Pero kon esaki ta funshoná realmente den práktika?
Paso nos sa ku tin kòntròl i a sigui ku kòntròl, pero ta importante pa esaki bai na un manera responsabel ( i perkurá ku no tin ripitishon di inkumplimentu ku lei. Kaminda faya ku lei duna e sanshonnan). Mas aleu e Parlamentario a puntra si tin un pròtòkol pa hasi e kòntrolnan aki i kon frekuente ta hasi kòntròl?
A surgi hopi konfushon tambe den komunidat si e produktonan tabata dañٔá si òf nò. Konfushon tokante fecha di vense etc.
No ta mihó sali den publisidat ora ta 100% sigur di algu pa no krea pániko?

Rozendal a indiká ku ounke ku a trata e tópiko produktonan kaduká, e a para ketu tambe na un aspekto mes importante, ku ta konsientisashon di nos pueblo tokante e tipo di produktonan ku nan ta kome i bebe tur dia. No ta solamente produkto òf karni kaduká so por hasi daño na nos salú sino tambe produktonan manera (ekseso di) salu, (ekseso di) suku, trans fat/ vèt, pa menshoná algun.
Den e kuadro ei e Parlamentario a puntra Minister di Salubridat tambe banda di Fundashon pa Konsumidó, kua instansia mas ta konsientisá e konsumidó riba partikularmente produktonan alimentisio i su posibel efektonan riba salú di hende?
Kiko konkretamente ta keda hasí pa konsientisá siudadanonan riba e efekto di produktonan manera suku, salu, trans fat, riba nan salú?
E a duna komo èhèmpel kon tambe por konsientisá e konsumidó i komunidat.
Hopi aña pasá, a bini riba paki di sigaria un etiket ta bisa: Roken is Dodelijk (na Hulanda) i na Merka tin un Surgeon Warning ku ta bisa: “Smoking causes lung cancer, heart desease, Emphysema (emfesima) and may complicate pregnancy”
World Health Organization a ratifiká na 2003 e uso di e “warning sign” aki riba paki di sigaria.
NA 2009 a hasi un estudio ku ta prueba ku e warning sign aki a pone hende ta mas konsiente di e peligernan.
Rozendal a puntra den e kuadro aki si
a yega di konsiderá pone un atvertensha asinaki, por èhèmpel, den rèki di supermerkado kaminda tin produktonan ku ta kontené hopi suku òf salu?
Kaminda ta pone por èhèmpel: “Suku por kousa diabetisi” òf “Salu por kousa preshon haltu”

Rozendal ta di opinion ku sigur ku banda di kòntròl i sanshon di un banda, mester hasi muchu mas na konsientisashon di otro banda i asina prevení malesanan i gastunan haltu den salubridat aki na Kòrsou.

Mester hasi tur posibel pa protehá e konsumido pero mi ta kere sigur ku e konsumidó tambe por tuma un ròl den esaki dor di kontrolá fechanan di produktonan, raportá, kontrolá kiko e ta kome i hiba un bida mas saludabel.

Elsa Rozendal
Parlamentario pa Frakshon di MAN

Leave a Reply