KOMUNIKADO DI KUERPO POLISIAL KÒRSOU Detenshon pa resistí aresto, violashon di Lei di Arma di Kandela i droga

KOMUNIKADO DI KUERPO POLISIAL KÒRSOU
284 / 2017
30 yüli 2017
Detenshon pa resistí aresto, violashon di Lei di Arma di Kandela i droga
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
Djabièrnè 28 di yüli 2017, alrededor di 12.40’or sentral a dirigí un patruya di polis na un kompleho di negoshi riba Rooseveltweg pa un persona no deseá na e sitio ei.
Na yegada di e patruya nan a topa ku un hòmber ku tabata komportá su mes hopi ònbeskòp i tabata pleita ku e personal di un snèk ku tin na e sitio. E polisnan a trata di kalma e hòmber pero e no tabata ke tende i a sigui ku su insultonan i mal komportashon. Polis a duna e hòmber aki òrdu pa e bandoná e sitio aki. E hòmber no a sigui e órden di polis i a lanta kontra di e polisnan i inkluso a ofendé e agentenan polisial. Na e momentu ei polis a detené e hòmber sospechoso aki, N.A.J.P. nasé na Kòrsou, 50 aña di edat. E sospechoso a resistí su aresto i a drumi abou. Polis a pidi asistensia pa por transportá e sospechoso.
Kontinuando ku e investigashon na e sitio, polis a haña informashon ku e hòmber aki ta den posishon di un arma di kandela. Polis a kontrolá den un tas ku e tabata tin serka dje i a haña kuater(4) saku chikitu konteniendo mariwana den e tas.
Polis a transportá e sospechoso pa warda di polis. Na warda polis a kontrolá e sospechoso mas riguroso i a haña:
 Un arma di kandela tipo 9 mm derringer
 Dos (2) bala skèrpi
 Un saku chikí konteniendo kokaina
 Rifel di airu
A presentá e sospechoso dilanti di un Fiskal Ouksiliar ku a ordená su enkarselashon pendiente di mas investigashon.

Leave a Reply