MINISTER DI DESAROYO EKONÓMIKO DR I.S. (STEVEN) MARTINATA ENKABESÁ MISHON KOMERSIAL PA REPÚBLIKA DOMINIKANA

MINISTER DI DESAROYO EKONÓMIKO DR I.S. (STEVEN) MARTINATA ENKABESÁ MISHON KOMERSIAL PA REPÚBLIKA DOMINIKANA

WILLEMSTAD- Komersio eksterior ta di sumo importansia pa Kòrsou, konsiderando e limitashonnan di un ekonomia chikitu. Pa e motibu aki i komo parti di su maneho di kooperashon ekonómiko ku eksterior, Ministerio di Desaroyo Ekonómiko (MEO) ta organisá un mishon komersial pa Repúblika Dominikana di 28 pa 31 di ougùstùs awor, enkabesá pa Minister di Desaroyo Ekonómiko Dr I.S. (Steven) Martina. Meta di e mishon ta pa fortifiká e lasonan komersial ku e pais.

Repúblika Dominikana a keda identifiká den e Akuerdo di Gobernashon 2017-2021 komo un di e paisnan di prioridat, siendo un ekonomia ku un proyekshon pa kresementu di 4,5% den 2017 i ku hopi posibilidat pa importashon i eksportashon. Ademas, Kòrsou ta mantené lasonan históriko, sosial, kultural i komersial hopi estrecho ku e pais.

Reino Ulandes a firma un Memorandum of Understanding (MOU) ku Repúblika Dominikana na ougùstùs di 2016. E MoU ta abarká diferente área di trabou i e mishon komersial di ougùstùs próksimo ta representá un akshon konkreto pa ehekutá kontenido di e MoU.

Pa medio di e mishon, empresarionan lokal tin un oportunidat pa establesé kontaktonan komersial i eksplorá e merkado na Repúblika Dominikana. Konkretamente e mishon aki ta enfoká riba e siguiente sektornan: turismo, zona liber, energia, negoshinan chikí i mediano, logístika i servisio finansiero internashonal.

Ministerio di Desaroyo Ekonómiko tin un ròl fasilitadó i lo sòru pa tur partisipante por partisipá na partinan di e programa i seminarionan. Tambe MEO lo sòru pa e asina yamá “match-making”. Kada partisipante ta responsabel pa su propio gastunan di biahe, akomodashon i transporte. Por registrá te ku djabièrnè 4 di ougùstùs próksimo. Pa mas informashon tokante e mishon òf pa registrá por bishita e página di Facebook di Ministerio di Desaroyo Ekonomiko i tuma kontakto ku representantenan di MEO (Sektor di Kooperashon Ekonómiko ku Eksterior):
Señora Patricia Pinedo via patricia.pinedo@gobiernu.cw òf yamando 462 1444 ekstenshon 126. Tambe por tuma kontakto ku señor Saïd Hensen via said.hensen@gobiernu.cw òf yamando 462 1444 ekstenshon 194.

Leave a Reply