Komunikado relashoná ku Dia Internashonal di Hepatitis

Komunikado relashoná ku Dia Internashonal di Hepatitis

Willemstad – Djabièrnè dia 28 yüli ta Dia Internashonal di Hepatitis. Hepatitis ta un malesa viral ku ta wòrdu kousá dor di e Hepatitis vírus. Tin diferente tipo di Hepatitis, pero tiponan di Hepatitis mas importante ta Hepatitis A, B, i C. Hepatitis ta un infekshon di higra. Hepatitis A ta wòrdu prinsipalmente transmití dor di higiena sanitario, miéntras ku Hepatitis B i C ta wòrdu transmití via di sanger i kontakto seksual i bou di drogadiktonan dor di uso di angua kontaminá.

Síntomanan di Hepatitis B ta: Geelzucht (dehel) na kueru, wowo, urina maron oraño, kentura, sushi kolo kla òf blanku, kansansio, pèrdèmentu di apetit, sakamentu i mariamentu i doló den barika. Mayoria hende ta kura, pero 5-10% ta keda karga e vírus permanentemente. Mundialmente tabatin pa fin di 2015, 325 mion hende bibando ku Hepatitis króniko. Ta kalkulá ku mundialmente 257 mion hende ta bibando ku infekshon di Hepatitis B, i 71 mion ku Hepatitis C. Den e mesun aña 2015 1,3 mion hende a fayesé. Pa aña 2030 e metanan mundial ta pa test 90% di hende ku Hepatitis B i Hepatitis C i pa trata 80% di pashènt ku ta bini na remarke pa haña tratamentu.
Reflekshonando riba Hepatitis na Kòrsou, por konstatá ku Hepatitis B i C no ta malesanan frekuente, mas bien hopi sporádiko.

Último añanan e kantidat di kasonan konfirmá na nos laboratorio nashonal ADC pa Hepatitis B tabata 0,02% den 2016 (34 kaso) i den 2015 práktikamente igual 0,02% (31 kaso). Pa 2017 te ainda a registrá 11 kaso (0,001 %) ku ta proyektá direkshon pa un bahada èkstra den 2017 kompará ku e añanan anterior. Riba tereno di prevenshon Kòrsou ta hasi hopi, den e sentido ku a kuminsá vakuná tur beibi resien nasí ku vakuna kontra Hepatitis B, lokual ta pone ku pa aña 2017 mas o ménos 12.000 mucha a haña esaki.
Pa trahadónan den institutonan di kuido tambe tin un programa preventivo kaminda kada trahadó ku ta bini den kontakto ku pashènt, inkluso dòkter òf enfermeranan, mester keda vakuná kontra Hepatitis B. Pa ku adulto tin protokòl preventivo pa evitá ku trahadónan di salubridat ku haña un asina yamá ‘prik accident’, esta ku den kuadro di trabou nan wòrdu hinka ku angua òf ku sanger spat den nan wowo durante operashon, por pasa na desaroyá Hepatitis.

Leave a Reply